MASCARET E MULET - Yantin déu Chapelot
Reclams 1978 - 1 - p.30
En cade endret que- y tienè û hort pa de boeus, péu de roumen, baduts à case e masedats dab lo gran arrascle. A nouste, lous darrès qui aboun qu'èren mascarèts, coulou de brase, pesans e segus enta-u tribalh.
Mascarèt lou dretè e mulèt lou gauchè que hasèn segui de hortes cargues sus lous mey grans penéns. Per la sesou de las batères que tiraben à la caus enta muda la gran batuse... Més péus machans parsâs, bèt soubèn, que calè arrehourni très ou quoate pas de méy enta ha corde.
Aquéres courdioles de bestia que maneyaben à gran brut l'utis de la batère. Per tan de passadés e de bouteclots qui traucabe, la batuse que seguibe...
Aquets boéus qu'abèn quauqu'arré de beroy.lous ûs qu'èren dretès, lous autes gauchets, quauques-us que tiraben a tout cap, més û cop beroy yunguts, que-s desbroubaben la tume bielhe. Au loc de s'embraca, e per tan machante qui estésse la mousque, que-s en abienèn coum cau enta ha de beroy tribalh amasse.
Despuch quauque tems, hens toutes las coumunes qu'an tournat atela la gran batuse, mayres e adyoens à la caus, dab touts lous counselhès enta ha corde. Adare, enta-us qui soun à l'ateladére, tira que cau !