BESTISSI AUSSALES

Lou bestissi de l'Aussalése qu'éy mey atriquetat. Qu'en porten atrunes à dessùs! Lous péus ne soun pas enchignoulats més miey-partits per ue raje, trenats e enribanats. Que soun caperats per l cohe blanque, broudade à daban, tiengude per lou courdadé négre e per dessus, en place deu sacot de lî qui nou-s porte méy, û foular de cap, filosèle ou madras, noudat deu mentou. Lou soubac, bèt cop broudat de punts d'escalete, las manjes boufantes, qu'éy ue camise de lî. Lou perpunt de coulou, doublat de téle, dab de bounes eschancrures, cindrat, que sarre plâ lou poutralh. Lous coutilhous, l'û sus l'aude, qu'an l'amplou e que soun frouncilhats. Que-n y poudè abé très: lou coutilhou de debatch ou secret, de drouguet rajadis, frounçat, lou pelhot de miey, fripou, leujè, lou coutilhou de dessus, moudèste, en estoffe coutouadisse, négre ou de coulou. Que pot esta lou burrat, de hiu fî, passat au hour e lissat en bapourade, lou bach bourderat d'arrouy ou mey souben de blu. Lou debantau, serbiciau, qu'estaubie de la soulhadure e qu'ey tiengut per u liguet de l'oun se passe lou mànchou de la hoursère. debatch deu chale de lâ l'ibèr, de cabilh l'estiu, ue bèste ou û cos de pèce que pincen sùu perpunt. Las cames que soun bestides de caussilhes de lâ blanque ou souben de goalhars de lâ de pèce, mientenguts per las camaligues. E dessus deu pè, lous gansòus que croubechen lous esclpos en nas arrebirat. Que soun, eyts, curats hens û tros de rèchou coum lous de l'òmi. Que porten gansole de coé, puntade de tachetes. la sole que porte û herratje qui éy claberat dinquio la nasete. La roupe, ue cape de pèce qui aprigue dinquio aus pès, que-s hique quoan hè lè. La plouje ne trauque pas e que bire beroy deu ret.