BESTISSI AUSSALES

Dab las maynades, despuch la coumuniou, que cambiaran l'abilhè. L'abiade de la bite que-us amie enta la goujatère.Doungues, en praban, badut, goujates e goujats, lou joenè aussalés que-s afaytabe coum lous qui èren hèyts. E si èren fiers d'amerca lous qui abèn granejat abans eyts, que-us demourabe, praubéts, la bite e lou tribalh, lous plasés e lous turmens. Tout qu'anabe créche de seguide, e que calè préne lou boû. La bestidure de "l'en tout die" de l'Aussalés n'a pas arré de riàle. Sùu cap que porte lou berret marroû ou bluas, broucat à case à quoate bets e batanat. La camise qu'éy de lî, lou goulèt mountat sus las arrupes, boutoade de boutoû de lî, à pugnet estrét. Lou gilet qu'éy hèyt de rase ou de tele e que sarre plâ lou pètch. Las culotes courtes sounque enta las hèstes arroujes, ne-s porten pas méy.Lous pentalous de pèce, à pounlhèbi, que soun tienguts per ue cinde de lâ negrouse, las penderilhes deu coustat esquèr, mes tabé, adare, de coé.Penut sùu curroû, qu'éy lou saliè, qui serbech, per la sau, a encita las aulhes au seguissi. La camisole, bluarde ou négre, adare desbroumbade, ubèrte sùu gilet, l'enmanchatje larjas, loung, que croubibe dinquio las coeches. A las cames que porten las causses de sastras, de pèce, ou de goalhard broucades per la daune. Aus pès, lous eclops que soun à nasèt, dab l'empalhade, à la sole boumbade, herràts de clabuches, en rèchou causit chens brouncs, de bete. Lou barrot d'aberagnè, ou de mesplè bourrugat à la mâ dréte que fenibe d'assegura e de da pés, chens barlanguère, l'auforgue sus l'espalle d'u coustat, lous bernous de l'aude. Qu'ère plâ campat.