RETRATTAT - Zabiè de Pucheu

Reclams 1970 - N°5/6 p.75 En prénen la retreyte, que-m soy troubat auta leuyè coum "blounde", la bielhe cabale quoan se troubabe desatelade. la bèstie desliurade dous arnès que-s segoutibe e, urouse, que-s enhournabe hens lou soû courtalh, ou, s'ère l'ore, que partibe leuyère tau pechedé. Pariè, despuch setème, que-m béy libre coum l'ayre. Quoan hè beroy, lou casau dab lous soûs plasés que-m ahisque. Labèts, la pièle dou boy qui bouléré esta talhucade e recttade que-s acounorte à demoura lou permè die de plouye. Que pense qu'a l'acès dou coustè que serèy tout ad ére. Més, entertan, dab toutes aquères causes qui-m parlen, que bey que-m enpacanti tad escribe e que-n soy drin bergougnous...Felibres nou se-n y trobe à tout pè de mate. Noû, qu'èm d'ûe trempe desparière. Ta nous, nou coumpte que ço qui ligue lous côs e las amnas, en coumençan per la parladure qui ey caupide de la sayesse dous noustes dabancès. Nous auts, nou boulém, dou passat, amassa que ço de beroy qui puye sus las obres dous òmis, coum la créste sus la lèyt.